पत्रातला मजकूर!

तुझ्या नेत्री विखारच जर प्रिये सामावला होता

तुझ्या पत्रातला मजकूर का ओलावला होता?.... १



पहाटे जाग येते ही तुझी सय, अन्य ना काही

मला झुरता बघूनी चंद्रही रोडावला होता.... २



खिसेकापू इथे धन्वंतरी झाले पहा आता!

"जपुन देहास ठेवा", मंत्र मजला गावला होता.... ३



तिच्या केसांत माझे श्वास गुंतावे म्हणूनी का

तिचा गजरा फिरूनी एकदा सैलावला होता?.... ४



सुरेच्या वर्णनाने आज गझलेला नशा आली

तिचा प्रत्येक मिसरा वाटते धुंदावला होता... ५