Thursday, July 9, 2020

कृतज्ञता

पाहता पाहता
कोविड पसरे
जगभर सारे
धास्तावले….

शहराचा पैस
आडवा तिडवा
पालिकेची सेवा
घरोघरी….

कुठे कुठे जाती
घडामोडींसाठी
वार्ता पोचविती
संजय जे….

कुटुंबाच्या आधी
लोकांसाठी धावी
काळ वेळ नाही
पोलिसांना….

इस्पितळांतून
रुग्ण शय्यांवर
यमाशी संगर
डॉक्टरांचा….

पंढरीला काही
गेलो नाही जरी
असा भेटे तरी
पांडुरंग`….
______________
(देवद्वार छंद)
______________

मधुरा वेलणकर -साटमचा सुप्रसिद्ध कार्यक्रम 'मधुरव'!   ह्या कार्यक्रमाच्या पहिल्या सीझनचा विसावा भाग म्हणजे सांगता सोहळा. शुक्रवार, शनिवार, आणि रविवार असे तीन दिवस फेसबुक लाईव्ह ह्या माध्यमातून शेवटचे तीन भाग म्हणजे भाग मधुराने सादर केले. ह्या तीन भागात मुंबई महानगर पालिका, वार्ताहर, पोलीस , आणि डॉक्टर अशा चार क्षेत्रांचे प्रतिनिधी म्हणून त्या त्या क्षेत्रातील जाणकार व्यक्तींना तिने कार्यक्रमात आमंत्रित केलं होतं. इथे लिहिलेली कविता ही खरं तर मधुरवच्या सांगता सोहळ्यानिमित्त या चार क्षेत्रांत अहोरात्र काम करणाऱ्या सर्वाना कृतज्ञता म्हणून मी लिहिली आणि मधुराने ती खूप सुरेख अशी सादर केली.

तो कार्यक्रम इथे क्लिक करून पाहता येईल.
________________________________